Wovenscapes: By Dinesh Kurekar
At- Jahangir Art Gallery
आर्ट आणि क्राफ़्ट या
दोन्हीचा मनोरम सुंदर आविष्कार पहायचा असेल तर जहांगिरमधे भरलेले दिनेश कुरेकर या मास्टर आर्टिस्टच्या ’टॅपेस्ट्री पेंटींग्ज’चे ’वोव्हन्स्केप्स’
हे प्रदर्शन बघायलाच हवे. जहांगिरच्या
कलादालनात पाय ठेवल्याबरोबर तोंडातून ’अहा..’ असे शब्द उमटतील आणि आपण थक्क होऊन
चारी भिंतींवर पहातच राहू असे कला-प्रदर्शन कितीएक काळानंतर पहायला मिळाले आहे.
अतिशय सुंदर त्रिमीत
परिणाम, गडद, झळाळत्या रंगसंगतीतली डिझाइन्स.. ही विणलेली पेंटींग्ज आहेत हे आधी
माहित नसतं तर विश्वासही बसला नसता इतक्या सूक्ष्म, एकमेकांमधे मिसळून गेलेल्या
रंगछटा.. कधी काळ्यावर किंवा गडद निळ्यावर डीप ऑरेंज, मॅजेन्टा, व्हर्मिलिऑन
सारख्या सॉलिड, सॅच्युरेटेड उबदार रंगांचा खेळ, कधी म्यूटेड इंग्लिश पॅलट, ब्राऊन,
ग्रे, करडा.. काही कॅनव्हास नजरेत मावणार नाहीत इतके भव्य.. काहीही लहानसे
चौकोनी.. पण कशावरुनही नजर हटत नाही. त्रिमित परिणामाची मजा अशी की पेंटींगच्या
एका फ़्रेममागे दुसरी फ़्रेम आहे असा भास होत रहातो बघताना. नजर त्यातल्या
लेयर्सवरुन, मऊ पोतावरुन घसरत रहाते.. रंगांमधे अडकून रहाते.
ऑइल पेंटींगमधले ब्रशस्ट्रोक्स
वाटावे इतकं सुंदर, तांत्रिक सफ़ाई असलेलं उच्च कलात्मक दर्जाचं हे काम आहे.
कमळे, सूर्य,
पाण्यातली प्रतिबिंब.. अशा पारंपरिक, निसर्गातल्या मोटिफ़्स मधून विकसित होत
ऎबस्ट्रॆक्शनकडे गेलेली डिझाईन्स.. अवकाश आणि काळाच्या सीमेपार पोचलेले त्यातले
अर्थ. कुरेकरांमधल्या आर्टिस्टचा वैयक्तिक प्रवासही त्यात आपसुक दिसतो.
पारंपरिक कला
टिकवायच्या असतील तर त्यांना अशा त-हेने आजच्या युगाला साजेशा कलात्मक पद्धतीनेच
कलावंतांनी साकार करायला हवे. कुरेकरांचे काम त्या दृष्टीनेही महत्वाचे आहे.
गालिचा विणकामातल्या
पारंपरिक, नजाकत आणि सौंदर्याला आधुनिक तंत्रद्न्यान आणि समकालिन कलादृष्टीची जोड
मिळाली की काय होते ते पहायला तरी जहांगिरमधे जायलाच हवे.
No comments:
Post a Comment